Gaguritan Aji Palayon

PUPUH SINOM

1.     Wahya dyatmika astawa

Asung Ratu nyuwecaning

Hyang Sukma Parama Cintya

Antuk purune mengawi

Nanging dasar saking bakti

Dumadak sida kapangguh

Indik tata pangeriptan

Antar sida mapikolih

Nemu rahayu

Anutin tur paripurnan

2.     Sapanyujur I Manusa

antar suka lila trepti

kengin titian I Manusa

ikatunan manumadi

nging kadi paksi kapecit

gempung swara awak kurus

dugi langgah nyaritayang

engkah ingkuh manumadi

sampun lampus

arsa nincap suarga loka

3.     Linggih Ida ring Parhyangan

Ento atmane utami

Girang sida paripurna

Ica ngardi ledang kanti

Arsa ring Swagotra sami

Nyinayang ngardi rahayu

Kukuh ngamong dharmagama

Utama ring tiga guru

Tulus nyungsung

Apan meraga kawitan

4.     Kawit mangkin kacritayang

Panca Indria sampun basmi

Pucah kesarpaning manah

Antuk dasaksara utama

Aji kalepasan malih

Ngawe atmane rahayu

Sida mesat ring kurungan

Kakurung duk saking riin

Sampun metu

Sang atman sida melesat

5.     Kagiat sang wara atma

katon Dewa Barong luwih

dumilah ireng wulun niya

kakerebin wastra putih

mewali sira mengaksi

angga sarisa puniku

nuli sang atma matulak

kurungania ketampekin

kala ditu

sang atma asih ngandika

6.     Sang Tresna asih nyaratang

Ngarumrum sang nandang sedih

Bawos alus merdu lindia

Duh Dewa kurungan mami

Genah muruk nyaraswati

Asramangku kita tuhu

Tan sida ingsun lipia

Swecan Ida mautami

Sida putus

Ngagem Dharma lan Agama

PUPUH GINADA

1.     Ginositan wara atma

soka tan sida mewali

apan sampun panumaya

Sang Atma agia mawuwus

Ingsun pamit away soka

Madak malih

Pungkuran sida katemu

2.     Uduh sang meraga kurungan

Budal Idewa kageni

Taler mantuk maring toya

Mulih maring Sang Hyang Bayu

Ring Pertiwi I Dewa budal

Nangun kerti

Nyujur yasa mautama

3.     Ngardi kasukaning jagat

Metu kita ring Pertiwi

Nyusup ring sarwa mula

Ring kedapan miwahobun

Ring who miwah pala bungkah

Tur mewali

Nyusup ring sajeroning garba

4.     Ring Bayu nyusup ke angga

Ngardi amerta utami

Sida ngardi paripurna

Rahayu sepanjang tuwuh

Kala ditu moga sida

Pangguh malih

Mada sida matunggalan

5.     Uduh dewa meraga angga

Ingsun amwita ne mangkin

Away dewa sokang manah

Apan kardin Sang Hyang Tuduh

Sedek sang atma mewarah

Wenten saji

Kacingak antuk sang atma

6.     Ring prasangka samping laywan

Sregep upakara suci

Genep pada masorohan

Sekarrura samida arum

Panjang ilang bubur pirata

Nasi takil

Sega tepeng perangkatan

7.     Iwak itik lan pajenengan

Darpana agung atanding

Darpana alit catur lima

Jangkep ring segehan ipun

Manut upakara plata

Wenten malih

Pabersihan yeh kumkuman

8.     Sami pada cumandang

Ring parangkane metanding

Anak liyu pada teka

Gata agata lumaku

Wenten matimpuh masila

Wenten malih

Menyaraning gegambelan

9.     Ada masih mawirama

Aji Palayon kagurit

Akeh yaning ginesitan

Pidadabne ajak liyu

Ngiring mangkin caritayang

Pulapali

Dane sang meraga atma

10.  Kocap mangkin wara atma

Pacing matur ring atiti

Taler majeng ring swagotra

To ngawinang dane ibuk

Apan alabda ring karya

Ne kaapti

Mabawos matimbang rasa

11.  Kala punika kacingak

Wenten jadma berag lancig

Punika raris kaselang

Ngetor asta sukun ipun

Sang kaselang agia mojar

Alus manis

Ring swagotrania katinggal

12.  Inggih sang sweca ring titiang

Pirang atur titang mangkin

Titian atma tanpa kantia

Sarat mangda sida matur

Ledang ratu ngampurayang

Yaning sisip

Sampunang ja salit arsa

13.  Dahat sekil antuk titian

ngardi pahubungan malih

mangda sida mebawosan

maring ida dane ipun

apan titian kailehan

antuk jadma

lanang istri tuwa bajang

14.  Ana ya luwihang teja

Ika nulak sikian mami

Agia katemu ring kita

Yanging ana anak turu

Malih ya alabda teja

Nika becik

Ngawe sida kapangguha

15.  Sampunang banget mangenga

Pikolih kala mangipi

Patut malih kasuluhang

Antuk daging sastra iku

Sane patut patut raksa

Yaning polih

Sampunang banget sungkawa

16.  Panjang malih kaceritayang

Pidabdab ring para wangi

Wenten sane tatas uning

Wenten sane belog ajum

Wenten sane mautama

Wenten nista

Patut plapan ring laksana

17.  Pacang ngemangguhan papa

Yaning pacing manuwutin

Pidabdab anake nista

Napi malih belog ajum

Mawinan patut waspada

Mikayunan

Sampunang ngulah nuwutang

PUPUH SEMARANDANA

1.     Sahayangku makaesami

Tan sida titian ngengsapang

Indik paswecan Idewa

Palinggihan luwih masoca

Indik kata lan laksana

Makemiwah yadnya iku

Tetabuhan lan wirama

2.     Madasar baan kayun suci

Pangawalese ring idewa

Dumadak Hyang Widhi Wasa

Nugraha kedirgayunan

Ring idewa sinamian

Apan kita luwih nadu

Pradnyan tur sulaksana

3.     Apan sampun tepat janji

Titiang ninggalin idewa

Pacing mapasahang reko

Dumadak sida pungkuran

Titiang dewa matunggalan

Ngardi paripurna kayun

Kukuh ngamong darmagama

4.     Rwa bineda pasti

Tan sida ikang ipasahang

Sekatahing mawak suka

Sida manemu duhkita

Sekatahing sane panes

Sida mapuara dayuh

Sane urip pacing seda

5.     Yaning wenteng titian sisip

Titian nunas sinampura

Reh ning urip sareng katah

Kadi ngaben ring sendoknya

Makaplug sadina dina

Kadi payuk lawan tutup

Sami tan sida pasahang

6.     Inggih ratu peranda luwih

Swecan ratu mautama

tan patut nika laliyang

dumadak Hyang Widhi Wasa

sweca ring singgih Peranda

Mangde sida nemu ayu

Apan ratu sulaksana

7.     Kala titiang inastuti

Idep titian dados angan

Sadurunge kaastawa

Sungsut putek manah titiang

Kala titiang kabersihang

Antuk toya suci iku

Sikian titiang dados angan

8.     Ne mangkin titian mepamit

wastu singgih  Pranda Bagia

rauh ring sanak putua

titian ngaturang suksema

kapica sarin darpana

pabersihan toya kumkum

ngawe ening sikian titiang

PUPUH DURMA

1.     Tembang durma

Anggen titian nyambungan

Kucapan nang lupa mangkin

Sampun aluwaran

Makesyahnya kaerangan

Apan iya kailehin

Anak katah

Ada kedek ada ngeling

2.     Hyang Pandita

Raris mewarah warah

Anak putunya sang mati

Enggalang manyembah

Sang Atma agia lumampah

Gelis cariteyang mangkin

Pada nampiak

Agung alit lanang istri

3.     Ring tebenan

miwah ring samping laywan

matimpuh masila trepti

muspa ring sang seda

ujar alus ngeten manah

sat damar tinggalin sigi

kapetengan

eling tan sida mewali

4.     Keneh enyag

Kadi gedehe pantigang

Tan sida malih tutupin

Uduh sanghyang atma

Suwe pacang tan pangguha

Dumadak gelis numadi

Sida muwah

Makaronan sareng sami

5.     Uduh dewa

Sang rumaga wara atma

Titian waluya Ipasar

Kilangan bingin rob

Genah titian mesayuban

Mangdene tan kepanesan

Pinaka tedung

Ngardi dayuh manah titian

6.     Cingak ratu

sembah titian sangebakti

tumas maring suniantara

manis rempuh alan

ngardi tusta Sangyang atma

mirengan swaraning puji

kaworan sungsut

tresna ring sang katinggalan

7.     Caritayang

Sampun memargi sang atma

Jumjung ring pariyanganiki

Ring Hyang Guru reko

Aturnyane alus banbar

Inggih ratu Hyang Suksema

Asung dahat

Maraga sang pangkan parani

8.     Aksamayang

Titiang mepamitne mangkin

Pungkuran malih menampi

Suksma ratu titian

Pican ratu mautama

Ring titian meraga atma

Mogi tumus

Nyujur lokaluwih

9.     Amunika

Aturnyane sanghyang atma

Hyang purwaka gelis nyawis

Uduh wara atma

Wastu sidane kasurat

Ngamolihan lokaluwih

Mangda manut

Swakarma maring bumi

10. Sampun puput

Wacanan ida hyang kawia

Sang atma raris memargi

Diwangkara surup

Jagate remrem mekejang

I bukal ngindang ngambara

Pakarubut

Matingkah ring sarwapala

11.  Warakidok

joh sawat ya memunyi

sirin sang pacang manumadi

jejeh sang mangidam

takut pacang katangehang

sang ngidam during marabian

dadi ibuk

ngibukang sang makusara

PUPUH GINADA

1.     Punggelang punang carita

Sang atma bawosang mangkin

Nagkil ring Dalem Khayangan

Ring gelung korine rawuh

Kala rika kacingak

Sedeng becik

Hyang Bhetari ketangkilan

2.     Babutane pada nampiak

Manegak pada manangkil

Anja-anja lan akumangmang

Reregek lan basing kembung

Miwah malih enjek pupua

Wenten malih

Asu gaplong pada baktia

3.     Kagiat ya isarwa buta

Atmane karebut mangkin

Gumanti pacang katadah

Sang atma ya kapilayu

Kadi semal kaborosang

Saget prapti

Hyang Durga alus ngandika

4.     Uduh kita wara atma

Da jejeh ring buta buti

Apan sira sulaksana

Uruh ring aksara putus

Ida Betari nyewecayang

Tur manangkil

Ring sor Betari Durga

5.     Sang atma ngaturang sembah

Ring cokor Ida Betari

Atur manis ngawe rena

Ida Betari kasumbung

Luwih dahat mautami

Sida ngardi

Wara atma sida moksa

6.     Ratu dados sasungsungan

Watek manusane sami

Makamiwah para atma

Para buta buti iku

Iratu ngebek ring jagat

Kasungkemin

Ring sekala lan niskala

7.     Bagawati puspatanta

Ring bale agung malinggih

Micayang kadirgayusan

Yan ring setra linggih Ratu

Betari Durga kinucap

Ngardi trepti

Ring para atma makejang

8.     Hyang Berawi Puspatanta

Ring pamasmian kasiwi

Yan ring gununge malingga

Giri Putri aran Ratu

Yan ring panceran telaga

Pucak Giri

Dewi Danu kang puspata

9.     Yan ring luwah sane linggah

Dewi Gangga keastuti

Yaning malinggih ring sawah

Dewi Sri parab Ratu

Ratu miceyang amerta

Sida urip

Tan kirangan pabuktian

10. Inggih Ratu sasuwunan

Punika wenten sesaji

Aturan swagotran titiang

Sang sane kantun idup

Pamit mangkin Ratu titiang

Pacang ngungsi

Nyujur maring sunia loka

11. Hyang Betari mangandika

Wecanane alus manis

Kadi sekar ring kartika

Keblabarin pasir madu

Uduh kita meraga atma

Wastu gelis

Ngemolihang Suraloka

12. Sekancan pengadang adang

Ring alas miwah ring giri

Ring gowane sami olas

Sang atma raris umatur

Ature madulur sembah

Titian pamit

Tumuli raris memarga

PUPUH DURMA

1.     Caritanyang

Sampun medal ring kayangan

Bintang siyang galang kangin

Mamendak Hyang Surya

Manuk Paksi masuara

Atmane sampun memargi

Ngaja kanginan

Pemargine ngulanginin

2.     Terang galang

Sarwa sekar sampun sinah

Ebek ring sepanjang margi

Sumirik ambunya

Ngawe egar isadpada

Sadpada mangisep sari

Pada binal

Kadi wedan Hyang Sulinggih

3.     Menawita

Ngastawa Sanghyang Kawitan

Nunas ica mangda gelis

Atmane manincap

Swarga luwih mautama

Sang atma girang miragi

Tur mejalan

Ring Serayu rawuh mangkin

4.     Dahat kasub

Serayu luwah mautama

Sumilir toyania suci

Wenten sila petak

Karerebin wit cempaka

Atmane ledang masuci

Maring luwah

Ada Buaya menkain

5.     Bungut nyebk

Tumuli gelis ngarepang

Sang Atma sebet mekelid

Rikala katadah

Sang Atma gelis mewarah

Ih Sang Jagul Agung Adi

Nyaman titiang

Ari arin titian Adi

6.     Sapunika

Pewarah Sang Wara Atma

Jagung Agung mamirengin

Molah tugat nia

Raris tinut ring Sang Atma

Sang Atma raris ngawidi

Aduh Dewa

Gandong beli sane jani

7.     Apang enggal

Beli ngaliwati tukad

Jagul Agung ngemaranin

Nyerahang gigirnya

Sang Atma gelis manegak

Gelis rawuh ring pasisi

Tur mejalan

Ngaja kanginan mangungsi

8.     Ring alase

Sane mangkin caritayang

Ebek jurang rejeng kepanggih

Guwa lan payonan

Satwa sami pada girang

Agung alit ya mamunyi

Tur macanda

Saget ada mangesyabin

9.     Ada swara

Gede banter tan pegatan

Jejeh para sato sami

Buyar masingidan

Sang atma nuli kacandak

Ring raksasi ulu luwih

Krura dumilah

Megalak tur ngubat abit

10. Wara atma

Tan jejeh mengarepang

Matur banban ring raksasi

Uduh biyang titiang

Tejaning sarira wekas

Nyamping biyang titian memargi

Da menyandak

Raksasi gelis magingsir

11. Uduh cening

Putran meme wara atma

Gelisang cening memargi

Wastu cening bagia

Sida mangguhing swarga

Apan cening tatas uning

Aji praline

Sinah cening mapikolih

12.Tur sang atma

Mejalan ngaja kanginan

Rawuh ring madyaning giri

Ring suket lan jurang

Saget ada ya mangadang

Macan barak manyagnyagin

Atma mojar

Eda macan mialangin

13. Rehning macan

Mula panyaman titiang

Kala titian embas nguni

Sareng ring Idewa

Getih pawakan Idewa

Patut Idewa nulungin

Mangda sida

Titian molih genah suci

14. Malipetang

I Macan mejalan banban

Liyang Atmane nyingakin

Gelis iya lumampah

Cariteyang maring jalan

Kagiat dane nyingakin

Madyaning jalanan

Asu Selem menyadangin

15. Raris ngucap

Sang Atma sada banban

Aduh Dewa Asu luwih

Tututin titiang

Dewa mula nyaman titiang

Ring yeh nyom dewa malinggih

Duke medal

I Dewa manuntun titian

16.  Gegelisang

Asu ireng manyagnyagang

Tugatnyane kutal katil

Mamendak Sang Atma

Duaning uning ring menyama

Astannyane kasilapin

Tur nyambutang

Dewa gelisang memargi

PUPUH GINADA

1.     Caritayang sampun sawat

Sang Wara Atma memargi

Tajeg Ida SangHyang Surya

Kala tepet aran iku

Sang Atma raris ngastawa

Hyang Berawi

Nunas mangde Ida sweca

2.     Sampun muput ngastawa

Ring batu lempeh malinggih

Ditu disisin telaga

Atmane raris ngarungu

Paksi kelik mesuara

Ngewangsitin

Ada bhuta kala teka

3.     Gelis mangkin cariteyang

Buta Kala ngemaranin

Mangelur nagih manadah

Jani gantin Ngonge mupu

Maan menadah Sang Atma

Sane mangkin

Sang Atama mamunyi banban

4.     Duh kita sang Bawalkala

Miwah kita Sang Badmosti

Tan joh Sang Mrajasela

Sang Bas Pamiad iku

Sampunang brangti I Dewa

Titian atmi

Yan tadah tan sida patya

5.     Ih kita Sang Buta Kala

Gelis I Dewa mewali

Rawuh ring genah titian

Ada upakara ditu

Patut I Dewa menadah

Sareng sami

Mangda pada mikolihang

6.     Bubur pirata punika

Sang Bawalkala menampi

Sekarura punika

Mrajasela patut mupu

Nasi bubur patut nanggap

Sang Badmoti

Panjang ilang Badmiad nanggap

7.     Nasi takilan katipat

Sang Krede sane menampi

Be Bebek Sang Jigrug nrima

Prangkatan Sang Gridig iku

Sampun sami kapirengin

Tur mewali

Ngungsi ring genah meyadnya

8.     Gelis sampun pada prapta

Buta Kalane mamukti

Cucu miwah daging yadnya

Sami pada mangan kinum

Ngiring malih cariteyang

Wara Atmi

Ngelantur pacang memargi

9.     Mejalan ngaja kanginan

Alas gunung kaliwatin

Kocap mangkin sampun prapta

Ring marga tiga punika

Ring sising margi manegak

Saget prapti

Angin baret mailehang

10.  Kadulurin kedek ngakak

Atma kenken teka mai

Kalena edgar menyagjag

Atmane kalontang Sadu

Menyawurin sade banban

Da nyakitin

Dewa mula nyaman titiange

11. Inggih Beli Sang Suratma

Miwah to Sang Jogor Manik

Adi Sang Maha Kala

Dora Kala malih iku

Eda beli Adi bangran

Sane mangkin

Titian pacang nyariteyang

12. Caritane sampun lintang

Beli madan Anggapati

Miwah beli Prajapati

Adi Banaspati tuhu

Malih Banaspati Raja

Titian niki

I Tungtung tuara bina

13. Sang Anggapati Dewa

Ring papusuh ne malinggih

Maring cangkem dewa medal

Ah Ah swaran nyane tuhu

Dewan tugu to Idewa

Sedan carik

Ngebek ngewawa ring desa

14.  Sang Prajapati Idewa

Melinggih beli ring ati

Metu beli ring mata

Ih Ih swaran beli tuhu

Beli dadi Dewan Alas

Dewan Giri

Miwah Dewan Pepayonan

15. Banaspati ring Ungsilan

Metu adi maring kuping

Uh Uh swaranya utama

Dewan tegal adi tuhu

Dewan abian pekarangan

Dahat luwih

Ngebek ring sehanan jagat

16. Sang Banaspati Raja

Ring nyali adi malinggih

Eh Eh swarane utama

Dewa medal saking cunguh

Dewan Sema Dewam Balian

Dewan Pasisi

Dewan Dete miwah Tonya

17. Uduh beli Sang Suratma

Miwah Sang Jogor Manik

Maha Kala Dora Kala

Gelisang Dewa lumaku

Kema ke pondok titiang

Ditu tampi

Sesaji sampun cumadang

18. Kala Pat raris lumampah

Titian ngalin dewa jani

Kedek ya sambil mejalan

Pejalane dangkrak dungkruk

Sambil ya masesambatan

Madak gelis

Sang Atma polih kamoksan

19. Gelis mangkin cariteyang

Atmane sampun memargi

Saget ade tetamanan

Asri tur manudut kayun

Irika malila cita

Saget panggih

Telaga genah masiram

20. Toyane ening pisan

Pancake Tirta kapuji

Ditu atmane mesiram

Awaknyane katon belus

Mesalin kadi selaka

Wus mesangling

Nyaling gading asin pisan

PUPUH SINOM

1.     Punggelang punang carita

Ring swargan bawosang mangkin

Ida Hyang Widhi mewarah

Sang Atma patut pendakin

Antuk para Dewa sami

Juru payas juru kidung

Widiadari widiadara

Sami pada kanikan

Sampun adung

Sami sampun pada sedia

2.     Sarwa kober miwah tamiang

ring arep magenah sami

marerdod mejajar dua

payase mewarna warni

joli mas sesocan luwih

kaapit baan tedung agung

juru kidung ring ungkurnya

gegambelane nututin

sami adung

sampun medal ring swargan

3.     Pamargane mangambara

Dumilah mateja luwih

Kadi segarane membah

Ebekan sasocan manik

Ngardi angob Sang mengaksi

Sarwa becike mapupul

Ngiring mangkin caritayang

Sng Atma sampun masuci

Tur malungguh

Ring sor taru tangi jimbar

4.     Kagiat kayun mirengin

Kenten suryak wantiwanti

Swaran kidung gegambelan

Sumuyug pada nekain

Atmane kapendak mangkin

Dewane ngandika alus

Da jejeh wara atma

Hyang Widhi ngandikain

Ida asung

Apan Atma luwihing yasa

5.     Gelisang I Dewa munggah

Di joli mase malinggih

Ida Hyang Widhi nyantosang

Apan cening Sang Atma luwih

Ngagem Dharma gama jati

Setata ngardi rahayu

Tan bina kadi tansuran

Patut I Dewa mupunia

Dwaning ayu

Patut ceing mangguh Ayu

6.     Sang Atma matur manimbal

Aturnyane alus manis

I Ratu Langkung Nyungjungan

Titian tambet nenten uning

Ring kecap aksara suci

Miwah kaputusan iku

Tuna kanti turin nista

Tuna artin brana sami

Titian lacur

Nunas Ratu mangde sweca

7.     Dewane raris manimbal

Eda cening walang ati

Dyapin cening tuara nawang

Daging aksarane luwih

Kuranta bolong tan uning

Miwah sastra Dasabayu

Nanging sajeroning tingkah

Teleb mengastiti Widhi

Dharma sadhu

Sinah Hyang Widhi Sweca

8.     Puput Ida mangandika

Atmane munggahne mangkin

Malinggih ring joli emas

Raris ngambara memargi

Gegambelane mamunyi

Dewane mangupin sungu

Widyadari widyadara

Makidung sepanjang margi

Sampun rawuh

Ring Bancingah Suraloka

9.     Wenten bale Candrakanta

Ring jaban swargane luwih

Irika mangkin Sang Atma

Malinggih turin masuci

Para Dewane nyiramin

Mehyas mewastra alus

Sampun ne mehyas

Kejaya-jaya ne mangkin

Ring Sang Putus

Makemiwah Para Dewa

10. Sampun puput upacarane

Para Dewane mengabih

Raris manjing ke Swargan

Hyang Widhi sedek malinggih

Atmane ngaturang bakti

Aturnyane manis alus

Inggih Ratu Sasuwunan

Titian Atma tambet tangkil

Ring I Ratu

Nawi iwang ampureyang

11. Hyang Widhi ledang ngandika

Uduh cening atma luwih

Eda cening sumangsaya

Mula bapa ngandikain

Watak para Dewa sami

Mangde mamendak manyungsung

Surate suba nyihnayang

Cening mula Atma Suci

Nyandang patut

Molih swarga mautama

12. Patut anggen tatuladan

Ring para manusa sami

Pageh nganutin agama

Pitra Yadnya ngemarginin

Nista Madya Mautami

Sasidan antuk mamikul

Dasarin baan galang manah

Atmane sida ketampi

Sida kumpul

Manunggal ring Hyang Kawitan

Puput, Anggara 15 Mei 2012 

©©©©©©©©©©